اصلاح ما افسده……. الزمن “مشيها الزمن” يا اتحادات الكرة
بقلم: ماجد حسني
الكل يستمتع بالدوري الانجليزي من النواحي الفنية و الخططية و المتعة و الاثارة، فهو مثال لكيفية ادارة لعبة رياضية و تحويلها الي مشروع اقتصادي ترفيهي رياضي انساني ضخم…. و اين نحن؟ انا لم و لن اقارن لا سمح الله و لكن “خلينا نرغي شوية بالبلدي كدة”….
– هو ازاي كل فرق الدوري الانجليزي عندها جماهير؟
علشان يا سيدي كل فرقة تقريبا بتمثل المنطقة و المقاطعة بتاعتها زي عندنا كدة تلاقي نادي انبي بيمثل محافظة البترول و بتروجيت بيمثل حي الغاز و نادي اف سي مصر بقي بيمثل محافظة مصر…
– هو ازاي فرق الدوري الانجليزي كلها عندها فلوس؟
يا سيدي خلاص بقي، الناس عندها قاعدة جماهيرية و طالما القاعدة الجماهيرية موجودة يبقي الرعاة حيبقوا موجودين و الفلوس حتبقي موجودة، زي عندنا كدة لما القاعدة بتاعة مجلس ادارة الشركة او البنك تخصص شوية فلوس من ميزانية الشركة او البنك، ماهي نفس القاعدة…
– هو ازاي لعيبة فرق الدوري الانجليزي عندها الحماس و الحمية دي؟
انت مش قادر تفهمني لية، بنقول الفريق بينتمي لحي او مقاطعة فيها سكان و جماهير منتمية لفريق و مافيش قدام اللاعب احلي من كدة جو و احساس بالانتماء علشان يموت نفسة بالاضافة لقيمة اللاعب التسويقية و ادراكة لاهمية اللعب المستمر و الالتزام و الاجتهاد، زي عندنا كدة كهربا و صالح جمعة و وردة و عمرو زكي زمان و كدة يعني، يووووووووو مش بقولك حتتعبني معاك…
– هو ازاي الحكام غلطاتهم قليلة كدة؟
يابني بنقول منظومة كاملة بتمرن و تدي امكانيات و حقوق و بتحاسب، زي عندنا كدة لما كابتن جمال الغندور كان ماسك لجنة الحكام و بيحلل في احد دورات الخليج فمحضرش السوبر المصري في ابوظبي، عااادي…
– هو ازاي محدش عندهم يطلع يشتم في الاتحاد او الحكم؟
لا يا خويا بقي ساعات كدة في مدرب بتخدة الجلالة و يطلع يوبخ الحكم او الاتحاد و بيتوقف و بيدفع غرامة جامدة، زي عندنا كدة محدش يقدر يغلط في حكم ولا الاتحاد، مش دة اللي بيحصل يا متعلم يا بتاع المدارس….
طيب يا سادة انتم بتقولو انكم عايزين دوري محترفين للدرجة الاولي و التانية، طيب ازاي!!! تعالي كدة نشوف نجاوب علي الاسئلة دي…
– هو ازاي فرق الدوري هنا يبقي كلها عندها جمهور يعني؟
يا سيدي. هو دة الطبيعي، اولا حضرتك حتشوف الاندية اللي تحت السلم اللي هي معندهاش نادي اساسا و يا اما مدرسة او شقة اشترت اسم نادي و السلام و تقولها مع السلامة و تحاسب المسؤل اللي سمح لها و اداها رخصة اشهار نادي اصلا… و بعدين حضرتك تدخل علي الاندية الشركات اللي معندهاش مجلس ادارة منفصل و ميزانية نادي منفصلة و بترصد ملايين من ميزانية الشركة او البنك لصرفها علي الانشطة زي ما القانون بيلزمهم و تخلي القانون يجبرهم علي اختيار نادي شعبي لرعايته بما لة من قاعدة جماهيرية حتفيد الشركة تسويقيا افضل من فرقة شركة مش بيشجعها غير العاملين فقط و قدام الاهلي و الزمالك مش حيشجعوهم كمان…
بالنقطتين دول و التخلص من فرق تحت السلم و فرق الشركات تذهب لدوري الشركات و مراكز الشباب تذهب لدوري مراكز شباب قوي تحت رعاية وزارة الشباب، حتحل الازمة اللي بلا لازمة من زحمة الفرق في كل درجات الدوري…
طيب انت كاتحاد كرة تقدر تعمل كدة، اكيد تقدر بالتنسيق مع الدولة و الاتحاد الدولي…. خصوصا ان القيادة السياسية الحالية مش بيعجبها الحال المايل و ناس بتاعة شغل و انجاز، اشتغل انت بقي…..
الهجوم اللي ممكن يخوفك:
– انت كدة حرمت ناس كتير من اللعب و الممارسة
كلام فارغ و غلط، بالعكس بوجود دوري مراكز شباب و دوري شركات و بادارة كل شركة لاموال الرعايا و توجيها التوجيه السليم، حتبقي وسعت القاعدة جدا و رجعت الاندية الشعبية و اديتها قبلة الحياة..
– الشركات مش حتطلع مبالغ الرعايا
غلط لان القانون بيلزمها و الفلوس دي بيتم خصمها من الضرائب اللي علي الشركة و ممكن مع الدولة يتم تشجيعهم للصرف اكثر من هذا المنطلق…
هو حضرتك متخيل لما فرق زي المنصورة و الاولمبي و الترسانة و دمياط و دمنهور و البحيرة و الشرقية و المنيا و اسوان و سينا يتحولوا لفرق معاها فلوس و بتلعب في الدوري الممتاز مع الاهلي و الزمالك و سموحة و وادي دجلة و الاسماعيلي و طنطا و الفيوم و الاتحاد السكندري و المصري و الجونة، حضرتك متخيل الماتشات حتبقي عاملة ازاي!! كلة حيشجع فرقتة… لاعبين المحافظات حيلعبوا مع فرقهم اللي حتبقي قوية فنيا و ماديا…حيبقي في ايدك سلعة قوية و عندك قاعدة جماهيرية رهيبة تقدر تسوقها بملايين الدولارات داخليا و خارجيا…
في مكاسب تانية كتير بس للاسف صحيت من النوم……. مش بقولك حتتعبني معاك يا عم ماجد!!