هل وضعنا شروط او معايير لاختيار مدرب المنتخب القادم؟
طيب لو تم وضع الشروط و المعايير يبقى محتاريين لية؟
هل احد الشروط انة يبقى اجنبى؟
طيب لو احد الشروط انة يبقى اجنبى، تقدر تقولى لية؟
طيب ما كوبر كان اجنبى و حقق المطلوب منة بس بطريقتة اللى مش عاجبة حد..
هل انت واثق انك مش حتكرر سلبيات تجربة كوبر فى حالة اختيار الأجنبى؟
طيب اية مشكلة المدرب المصرى؟
خايف تختاره لية؟
خايف من الاعلام؟
خايف انة يفشل؟
طيب اية ميزة الأجنبى عن المصرى؟
عارف المميزات اية؟
المميزات انك حتشترى دماغك و تنقل المسؤلية كلها و ترميها علية؟
طيب هل الفترة الحالية اللى حندخل بعد ٣ شهور تصفيات الامم الافريقية حتستحمل واحد اجنبى يتعرف على الفرقة من اول وجديد؟
طيب هل الفترة تسمح لواحد لسة حيتفرج على الدورى المصرى و هو مايعرفش فية ولا لعيب؟
طيب هل انت ضامن نجاح الراجل الاجنبى او ضامن نجاح المصرى؟
طيب تقدر تقول لى اسم مدرب اجنبى واحد مسك المنتخب و نجح غير الانجليزي مايكل سميث بمساعدة شحتة؟
مع كل اختلافى و تحفظى على بعض تصرفاتة الا أننى ارى ان انسب واحد لتلك المهمة الان هو حسام حسن….
طيب عارف انت مش عايز حسام لية؟
مش عايزة علشان شخصيتة قوية و شغل مراجيح مولد النبى مش حيمشى معاة!!
مش عايزة لأنة مش حيسمح لحد من اللاعيبة انة يتعداة و يكلم السادة المسؤليين عن اللعبة مباشرة!!
مش عايزة علشان جمهور الاهلى قالب علية من زمان و جمهور الزمالك مش طايقة!!
مش عايزة علشان محدش حيقدر يفرض علية لاعب بعينة ولا يجبرة على استبعاد لاعب بعينة!!
مش عايزة علشان انت مش مستعد تقعد تدافع و تقنع الناس بة!!
مش عايزة علشان مش حتلاقى لة ماسكة و خايف ماتعرفش تسيطر علية خصوصا لو نجح!!
عارف بقى انا عايزة لية؟
انا عايزة علشان شفت شغلة على الارض قدامى على مدار سنوات….
انا عايزة علشان مابيخفش من حد…..
انا عايزة علشان مصرى حر و عارف قيمة اسم منتخب بلدة…
انا عايزة علشان عارف كل كبيرة و صغيرة عن الكورة و حال الكورة فى بلدنا…
انا عايزة علشان حافظ لعيبة مصر كلها و مش حيحتاج وقت كتير علشان يعمل منتخب يشرف…
انا عايزة علشان ماشتغلش مع فريق الا و عمل بصمة و نجح…
انا عايز مدرب علشان منتخب مصر مش عايز مدرب يعجب الناس و يسكتهم و بس!!!
Original Article: https://www.elmal3b.com/32519